Culture

Yuh Memba de days – Remember This in Jamaica

Memba the Jamaican Ice Cream Man
Written by Glen Benjamin

Memba wen yuh do all yuh homework at school so dat as yuh h reach home yuh ramp so til yuh hear smadddy shout out “yuh madda a ccooooommme!” and yuh dash inna yuh house and change yuh school uniform as yuh would surely get a beaten fi inna yuh uniform at 6pm.

Memba wen yuh go school 7 days a week fi keep yuh outa trouble. Mon – Friday regular school and private lesson, saturday class, and sunday school at church which is a half day affair

Memba if yuh kin poopah lick and bu’st out yuh pants, yuh get a beaten

Memba 10 cent bulla and jackass corn

Memba wen yuh turn on the tv at 4pm and wait till JBC sign on at 5pm, stand at attention sing the national anthem, and den sit back and watch some cartoon. And dont figet di Big Bwoy story whey yuh did haffi hide and tell

Memba wen yuh  a come fram school and stop fi pick cherry off Mass John cherry tree and dawg run yuh  dung

Memba wen yuh  madda sen yuh  fi tek the clothes fram affa di line but yuh  wait til night den yuh  fraid fi go by yuh self

Memba wen yuh  fraid fi go a shop by yuh self a night because Miss Matty jus’ dead and yuh  tink yuh  might si har duppy

Memba wen yuh  and yuh  fren dem decide seh unu a go run a boat, the biggest cart wheel dumplin yuh  eva si!

Memba wen coming fram school ina di rain and yuh  tek off yuh  shoes and walk barefoot all the way home a race board horse inna di gutter water

Memba wen dem use fi gi weh free milk powder and bulga rice a school, an’ yuh  play milk powder war all the way home

Memba wen dem good rice and peas and chicken Sunday dinna with a nice refreshing glass ah carrot juice

Memba wen yuh  ‘ave roast breadfruit and ackee and salt fish breakfast jus’ barely a day afta yuh  Saturday Peas soup wid cho-cho, turnip, carrot an’ punkin

Memba wen teacha beat yuh  because yuh  neva do yuh  homework

Memba marning time wen yuh  reach a school jus in time fi devotion and yuh  betta mek sure yuh  ave yuh  hym book and yuh  bible, yuh  pleat dem betta in order and yuh  khaki well starch

Memba dem good ole starch uniform ( coudda stan up by demself ) and yuh  nice shine brown or black shoes

Memba wen yuh  madda use fi seh “Go pick a switch mek a beat yuh ”

Memba Christmas time wen everybody a mek a suit fi gran market night, mama stay up a bake cake, draw sorrell, cook curry goat, don’t figet the case a D&G soda and red stripe beer weh unda the bed

Memba wen a ginnep seed fly dung yuh  throat and smaddy ‘ave fi lick yuh  back fi mek it fly back up

Memba wen yuh  swallow chewing gum & dem seh yuh  ago ded cause it ago tie up yuh  tripe Memba a come fram school and stap fi get the last piece a Miss Brown toeto and a sky juice

Memba dem seh nuh buy nuh sky juice fram Mr. Tom because ‘im ave sore foot

Memba wen dem seh nuh buy bun & cheeze from juicie cause him use di knife cut & clean him toenail

Memba saving part a lunch money fi buy ice cream fram creamy weh come pan Sunday

Memba a fling stone fi lick dung ginnep and the stone bus yuh  bredda head

Memba the peanut man … the jackfruit lady … the orange man … the sarda-pan man

Memba a play marble wid yuh  bredren dem

Memba a go a bush wid yuh  fadda

Memba a go undaneat the cellar fi the fowl egg (yes I do)

Memba a jump rope wid yuh  fren dem … One two Beeny … lick im mek im feel eh, mek im know yuh  mean eh, yuh  mean eh, yuh  mean eh

Memba playing “Miss Mary Mack Mack Mack, All Dressed In Black Black Black”

Memba a kick foot ball wid yuh  fren dem roun’ a ball grong

Memba wen Cristmus come and we watch JohnCunu jump up and down and we get fraid?

Memba yuh  madda sen yuh  go a shop and yuh  sing the list all the way deh … “one pint milk, one bread, 1 lb a flour. But wen yuh  reach deh, yuh  tell the shop keeper yuh  want “1 pint of bread, 1 lb of milk & a flour

Memba wen yuh  last yuh  madda money and yuh  fraid fi go back home because she might beat yuh

Memba settin up the roosta dem fi fight

Memba all dem good duppy story, and nancy story wi ‘ear growing up

Memba how yuh  use to fraid fi walk a night cause yuh  tink sey black-heart-man woulda tek yuh  weh

Memba wen bokkle cut yuh  foot bottam dung a gully

Memba wen yuh  use to stone Missa Smith mango tree dem, and we use to tink seh him have gun

Memba wen yuh  left all day and go a rivva an go cook and wen yuh  come come yuh  get a beaten

Memba wen yuh  unifarm get dirty Monday marning, and Yuh  madda beat yuh  ina di evening

If yuh memba all the above BWOY THEN YUH OLD

 

About the author

Glen Benjamin

I strongly believe there are 3 sides to every story. Telling each side is the challenge.

Darkness cannot drive out darkness; only light can do that. Hate cannot drive out hate; only love can do that - Martin Luther King