Firss come di Lightnin
Di Tundah a follow
Is Gahd grant deeze victree
Not one a dem ‘hollow

Well firss come de lightnin
An den fallah Tundah
Wise Jamaican a wait
Weh di Stahm? dem a wondah

True di Cloud dem a gaddah
Dis ‘ere no time fi play
Di People dem raddah
Carry ‘ome di relay

Wait, nah leff di team
Becah ‘ere come di Hie
An Olympic Dream
Dem cyan be deny

Rain come quench we tirst
But di Sistren too fass!
Juss as lass muss be firss

More time firss muss be lass

Well when team tek di track
Great Asafa di anchah
Dem nah baddah look back
Dem nah trouble by rancah

Dem feeget bout Rogge
Dem nah baddah wi spat
Commin like mahn ol’
Im wahn im puss nap

Muss remembah, fee-evah,
Time cannot diminish
World nah see ee, no nevah
Dem cyan share ‘photo finish’

Much a dem sank
An kiss muddah eart spritely
Each tek time fi tank
Dem Lahd Gahd Amighty

Nah check fi ee now
Nah wail no nah weep
Team Jamaica a vow
oon fahward fi sweep
Now a yahd wi a roam
Nuff medal wi shelve
In our ‘ome weh fran ‘ome
We a tek ee a twelve

Now dis ting dem call progress

Dem say muss incremental
Jamaica nah check fid dat
As we carry back nuff medal

As Jamaican we upfull
Carry song a we ‘eart
As Jamaican we ‘opeful
Dat di whey we a start

Bad mahn an bad mahn
Axe wha Olympic dem teach
Why, di fardah we strive
De fardah we reach

So rejoice! Top complain
Let peace Rain down upon us

For dis a di ‘Urricane
Tundah an Lightnin a promise

Mek dis lesson nah leff you
hout out fran church steeple
Mek di world know fi true
Out of Many, One People!