Announcement

Collapse

Boardite Facebook Group


Hi All



For those boardites who are facebook we have a Boardite Facebook Group. Be sure to check it out.
See more
See less

We hear sey....Tories fram dung a Kuntry

Collapse
X
 
  • Filter
  • Time
  • Show
Clear All
new posts

  • Hush Darlin
    replied
    Re: We hear sey....Tories fram dung a Kuntry

    No man a nay Patsy did dead lass year a the sista wey name Navlet wey the police dem out a station use to tek mek matrass...gal u shoudda see Patsy now u see ...gal look good u see...she go a Canada a year time pan the farm werking program wey dem ha fi ooman,
    You dun kno fimmi granny she nah nyam day dey beef at all and chroo dat fe yuh granny she nay buy none needa...mi hear sey fe monts de people dem neba stay out afta dawk mi hear sey all dung to the berry police dem did fraid a har mi hay sey a pere red and black breef dem did a wear and dem hardly use to patrol a nite time.

    Den Bev she is a nedda tory misis...a mi fren but laawd what a gal fe dash wey belly...mi sye one time she sen har likkle sista comeova mi yaawd come ask mi granny fe Blue (the blue wey u rinse white clothes eena) so mi like ediat and nay kno betta go eena mi granny baskit wey shi kip unda har bed wid dem sittn dey and tek out wan hola one and send ie go gi har and nay kno sey a belly she did a go dash wey widdi.
    Few days afta mi hear sey she end up eena haspital a bleed and pain a kill har and wen mi tek a stack a noh dash wey she dash wey belly...mi naily dead and wen mi ask u grany bout the blue she sey a dat the wukliss gal use...mi hear sey de dackta warn har and tell her next time a dead she gwine dead if she try anyting lika dat again.
    Now she marrid and waan ha pickney and cyaan ha none...as mi granny use to sey she tek har belly mek cemetry and wen the day a judgement come she haffi go face Mass Gad wid all a dem likkle pickeny a heng roun har frack tail a halla mamma mek u nay mek mi bawn....mi noh kno wey granny get dem dey sittn dey fram but a so she alwys sey

    Leave a comment:


  • Chrissy72
    replied
    Re: We hear sey....Tories fram dung a Kuntry

    Originally posted by Sweetssop:
    [qb] TO BE KANTINUD [/qb]
    Yuh si yuh, a yuh one! mi done chat peeple torey, yuh is one instigaytah, mi nah chat nummo addi peeple dem torey. Galang a yuh bed torey bella [img]/forums/images/graemlins/704555_dwl.gif[/img]

    Leave a comment:


  • Hush Darlin
    replied
    Re: We hear sey....Tories fram dung a Kuntry

    TO BE KANTINUD

    Leave a comment:


  • Chrissy72
    replied
    Re: We hear sey....Tories fram dung a Kuntry

    Originally posted by Sweetssop:
    [qb]no sah mi tink a waan mad ooman wey cum fram dung a Vere...she noh come fram bout yah at all..mi hear sey shi go a Englan and de ice full up har head an mad har [img]/forums/images/graemlins/704555_dwl.gif[/img] [img]/forums/images/graemlins/704555_dwl.gif[/img] [/qb]
    Awoe, mi noe arr, di whole setta dem mad fi chue, mi hear sey dem guh a Inglan guh look up pan di clack whey name Big Ben. [img]/forums/images/graemlins/704555_dwl.gif[/img] no wanda mi neva recagnize har, aye sah, mi ere sey she an har fren gat trait jackit dey wawk wid, mi ere addi same trait jackit she did ave awn an har fren bruk sawff jrinks bakkle an cut di jackit inna di back so she get out a it an di two a dem run outa di hospital.

    Leave a comment:


  • Chrissy72
    replied
    Re: We hear sey....Tories fram dung a Kuntry

    Patsy neva dead laws year? Mi cudda swear a she cow did buck an bruk awf one a di hawn inna, an she dead rite pan di spat. Yuh memba dat? it was so sad, mi neva guh ova di bush guh look pan di baddy atall, mi an dem peeple a neva fren anyways an alla di sista dem did fayva so mi neva noe dem diffrant mi call dem any nayme mi memba if mi haffi sey anyting to anyone a dem, plus dem ansa to any nayme...dem bwoy used to call dem Miss Tilda octoplett, di 8 a dem did fayva so till.
    Mi cyaa figet wen di cow did buck har, di cow did dead to caw di hawn did bruk bad, mi hear sey di owna fiddi cow Mass Sylvan bring im butcha nife an scale wen im ere, limb up di cow same place an sell im beef fi half price...fi di whole week di evry baddy inna di community nyam beef fi dinna. Mi hear dem bwoy always dem mek joke sey eff crowd neva come quick, Mass Sylvan wudda sell di dead gyal fi prime stake. [img]/forums/images/graemlins/704555_dwl.gif[/img]

    Mi laff atta Flotto when mi hear sey im did ketch di sitten fraw Patsy, serve im rite, caw im didda gwaan like im nuh deal wid dem gyal dey, mi ere no nite cudden paws an im nuh fling pebble pan di house tap, two pebble im fling so bip, bip an Patsy noe sey a fi har call dat, den she tell har madda sey she deh guh dung a di tilitt, a dung dey dem used to meet, no wanda she did sumell so bad. Flotta tawk bout 12 diffrant torey fiddi one sinting, mi hear wid mi two haze dem wen im didda tell some bwoy sey a chew becaw im ride dankey an jrap awf an lan pan im back im back strain so im gat di leak, den one nex time when mi did teef out fi guh watch di karachie show uppa di bamboo lawn mi ere im dey tell one nex bwoy sey im neva gat nutten caw wen im did dweet wid Patsy dem did dweet inna riva, an yuh cyaa ketch nutten when yuh dweet inna riva, mi nuh beleeve dat. Mi cyaa figet di time when Flotto Flotto did tell, Wingie fi jrink pepsi an lay dung flat pan har belly afta dem done duh outa-awdaniss fi nuh get pregnant, dat bwoy always cum up wid some chupid sinting, no wanda dem dey ketch dizeeze anda dem kakah, caw dem nuh practice fi proteck dem self, di gyal dem dis as bad.
    Wha Bev tell yuh sey she did uppa di dacta fah? Wha mek she nuh tawk fi har torey? All di same a yuh fren so mi nah sey nutten, mi hear a bout di fiff belly she dash whey.

    Leave a comment:


  • Hush Darlin
    replied
    Re: We hear sey....Tories fram dung a Kuntry

    Chrissy u did memba Nerva granny wey name Miss Kahrow..what a ooman couda cuss and den every sunday she gawn a cherch and mek sure sey shi siddung right up a front and oh be onto the smaddy wey mek de msitake and siddung eena fi har spat...and she did ha waan grandson wey name Harville feem madda did dead mi sey fly couldnt pitch pan Harville or no baddy couldnt even look pan him to hard she ready fe cuss dem
    Miss Kahrwo did ha waan son wey name Breed and him did marrid to waan ooman wey name Valdi who use to jrink and jrunk an cuss
    Miss Kahrow did ha waan nedda sone wey name Sam who use to teef peeple go and carry dem go sella Macooks Pen pan sundeh
    Mi sey what a sey a fambily did tan bad.
    Fe Nerva fadda him did name Bulla and him wife did name Georgie mi sey she did Hugley u see man if you a walk a dawk nite and si har dey cum u betta dash salt and run caa u woullda ha nightmare dat dey nite ie see...
    Mi sey wne mi Karro did dead everybaddy eena de districk did fraid u see...caa she use to walk and cuss badd wud ...fe husband did name Sarjant what a mand did ugly and shaawt,,,him did ha waan bredda wey dem call Hendri Mangoose
    memba if you seem and a go call im so u betta plane fe run and site rack stone awho
    Mi memba one time wen dem did a do cash program road werk and dem bwoy who did a werk wid im did get some egg trash and hide ie and den dem go pretend sey a buck dem buck up pan dem so dem coulda mek game afta Hendri Mangooose sey a him teef the fowl egg dem an nyam dem

    Leave a comment:


  • Hush Darlin
    replied
    Re: We hear sey....Tories fram dung a Kuntry

    Originally posted by ChRiSsY72:
    [qb]
    Originally posted by Sweetssop:
    [qb] mi sey deaf eays mek people tell lie and in dis yah cahe bline eye mek people tell lie caa a diffrant set a people u dey chat bout wi noh kno dem dey people wey u dey tawk bout [/qb]
    A who she Sweetssop, a who fah pickney she be, a nuh she come fraw ova Barracks?
    A muss di rang setta peeple dem she dey tawk fi chue caw mi nuh noe har, a so peeple dead an nuh noe wha dem dead fah. She betta galang guh mine har biznizz. [/qb]
    no sah mi tink a waan mad ooman wey cum fram dung a Vere...she noh come fram bout yah at all..mi hear sey shi go a Englan and de ice full up har head an mad har [img]/forums/images/graemlins/704555_dwl.gif[/img] [img]/forums/images/graemlins/704555_dwl.gif[/img]

    Leave a comment:


  • Chrissy72
    replied
    Re: We hear sey....Tories fram dung a Kuntry

    Eff yuh neva tell mi now sey a nuh yuh blood fambly mi wudden noe eh nuh, caw mi always ere yuh granny sey a nuh so she raise none a har pickney ar gran pickney, mi swear she was har blood...but now mi noe, effa chue yuh dey tawk. Effa laff a pap up, mi noe di big belly man whey she used to dey wid, we used to call im Blanch suga daddy, an Blanchie boops, one day mi si di man bodout shut, im gut so big das im nayble dey anda im chin, eff yuh tink a lie mi dey tell, mi swear ***spit pon finga an point to di sky***
    Yuh si yuh granny dey, mose addi torey whey my granny ere a she bring dem come dung a mi yawd, yuh si wen dem two ole ooman dey lap dem frack tail an sidung outa di ole kitchin pan di bamboo seat whey mi mad uncle bill, dem comb troo evry baddy torey wid fine teet comb, dem nuh miss out nutten narr no bady.
    A fi yuh granny fuss mi ere wid di gunnorea torey, poe mi tink a gun Gladys gie Buffy, yuh memba a so we did use to call di bwoy caws im teet dem did buff outa im ed, dem used to chubble im an sey im teet dem dey pan im lip. Lawd a massy, mi used to love gwaan like mi dey play wid mi dally tings dem an dey lissen di two ole ooman dem chat, natta villige lawya nuh noe peeple torey like yuh granny. Mi baffle ova di gunnorea torey so till mi ere fimi granny now sey how she see Buffy dunga clinic fi guh si di nerse fi get some purple an green capsull fi clear up di gunnorea...dat did soun nasty yuh si, das why anytime mi go gie one likkle peece mi mek sure sey mi gat one french letta, an if mi nuh gat none, mi rung guh buy one kisko pop an eat eh faws faws an use di kisko bag, caw mi nuh want fi ketch nutten, werse like ow mi granny did tink mi wassa virgin till mi a 18, poe she nuh noe wha used to gwaan roun a back arr when she gawn a bush gaw gie grampa lunch. But mi nuh fool fool, mi mek sure mi tell di bwoy dem sey eff dem mek one werd fly outa dem mout mi mek mi uncle chop dem up, poe bwoy dem ketch dem fraid, caw dem noe mi uncle wussa mad man.

    Leave a comment:


  • Chrissy72
    replied
    Re: We hear sey....Tories fram dung a Kuntry

    Originally posted by Sweetssop:
    [qb] mi sey deaf eays mek people tell lie and in dis yah cahe bline eye mek people tell lie caa a diffrant set a people u dey chat bout wi noh kno dem dey people wey u dey tawk bout [/qb]
    A who she Sweetssop, a who fah pickney she be, a nuh she come fraw ova Barracks?
    A muss di rang setta peeple dem she dey tawk fi chue caw mi nuh noe har, a so peeple dead an nuh noe wha dem dead fah. She betta galang guh mine har biznizz.

    Leave a comment:


  • Hush Darlin
    replied
    Re: We hear sey....Tories fram dung a Kuntry

    Originally posted by yardy:
    [qb] Mi noh beleive seh ie 2 a uunnnooo sidung a chat bout mi cusin Melva,afta yuh Sweetsap puppa breed har aan seh a noh him Wen yuh pa use to com fram markit a use to be de fuss place him tap fi count him change aan gi har big jill a coconut ile wid likkle rice aan suga aan den feel har up Yuh neva noh seh ie tek a wile fi dem figga out seh a him did a fingle de poor ting because shi neva eena har rite sense aan coulden memba seh a Mass Zekel im nyame. Rite now if yuh gu roun a de back mi anty haffe dash weh di wan khiah mattrass wa shi di buy fram Mass Joe dawta wa gawn a farrin. Soh wen yuh aan de wan bang belly Chrissy a spread rumor mek sure seh yuh get de tory propa [/qb]
    mi sey deaf eays mek people tell lie and in dis yah cahe bline eye mek people tell lie caa a diffrant set a people u dey chat bout wi noh kno dem dey people wey u dey tawk bout

    Leave a comment:


  • Hush Darlin
    replied
    Re: We hear sey....Tories fram dung a Kuntry

    Chrissy u did memba Miss Tilda jrunkie jrunkie dawta de wan wey nayme Patsy mi hera sey shi did gi Flotto Flotto gunnorea one time and when him tackle har bout ie she tell him sey a because dem did dweet eena sun hat a dat mek..
    Mi hear sey wen him did go a de haspital im tell de dackta dat im have leaks sey him liff up heavy baskit dung a mawkit and ie mek him have leaks...mi sey wen mi hear mi naily dead...mi fren Bev did eena the odda examination room an hear when him tell de dackta so and she buss a big dutty laff and de dackta had to sen har out a door...
    Bev sey u shoulda a hera him a chry kanvince de dackta sey a de load wey him liff...aye sah

    Leave a comment:


  • yardy
    replied
    Re: We hear sey....Tories fram dung a Kuntry

    Mi noh beleive seh ie 2 a uunnnooo sidung a chat bout mi cusin Melva,afta yuh Sweetsap puppa breed har aan seh a noh him Wen yuh pa use to com fram markit a use to be de fuss place him tap fi count him change aan gi har big jill a coconut ile wid likkle rice aan suga aan den feel har up Yuh neva noh seh ie tek a wile fi dem figga out seh a him did a fingle de poor ting because shi neva eena har rite sense aan coulden memba seh a Mass Zekel im nyame. Rite now if yuh gu roun a de back mi anty haffe dash weh di wan khiah mattrass wa shi di buy fram Mass Joe dawta wa gawn a farrin. Soh wen yuh aan de wan bang belly Chrissy a spread rumor mek sure seh yuh get de tory propa

    Leave a comment:


  • Hush Darlin
    replied
    Re: We hear sey....Tories fram dung a Kuntry

    mi sey dat ooman bring dung shame apn wi fambily ie see....a noh mi blood relative shi bi u kno...a mi granny fren did ar madda and she dead and mi granny sarry fi har seein dat none a har fambily nay want de respansibility a har and tek har and raize ar
    Whichen paawt a har a did virgin u mussi noh know how much man she use to tek eeen through de winda a nite time wen mi uset to go dung a mi granny fi haliday mi use to share room wid har and a nuff time mi hear de bed a shake and the ole spring dem a creak...mi sey she did ha waan ole fat man him use to pant a nd blow like a sey him out a breath and wen ie does a sweet har she does tek the pilla and kibber har mouth das she noh bawl out...good ting sey mi use to sleep pan the kot...
    But mi madda did fine out wha a gwaan and she did stap mi fram goin dung a granny go sleep.

    Mi did hear de skandal bout the lice tory...and Granny did cuss aff Blance ova it...caa u kno sey fi u granny and fimmi granny dida bess a fren and mi granny nay like how Blanche did tell dem lie pon you...
    An a noh Neville alone use to go a har house a nite time mi hears all sometine a 4 or 5 a dem and dem dis run a Duracel pan har....dem sey she ha white livva...ole gal wuckliss ie see...mi glad sey mi and har nay real fambily and mi granny noh want har backa har yaawd.

    Den missis u nay hear bout the time wen Mass Crooks ben foot dawta de one wey name Gladys did ha gunnorea and she did geet to Miss Mazel kin teet bwoy and mi hear sey de nexx time im a go dey im mek sure sey him but awwn chree french letta and rub some skatch bannit peppa pon the outside one...Massy mi king de poor gal naily dead..mi hear sey she run go dung ar sista yaawd a bawl out fe Jahnson Baby powda...fe cool ar dung

    Leave a comment:


  • Chrissy72
    replied
    Re: We hear sey....Tories fram dung a Kuntry

    Betta yuh sey im mout tink dan mi, but between mi an yuh, mi ere dranco pich pan him house tap one time wen im did gat one ratten teet inna im mout ...eeeww. Mi ere evry baddy haffi tan up ova di adda side a road fi chat to im, im brett was yucky...lawd...mi ere im put ole nail a fire an dig out di teet peece peece, im is one lucky son-of-a-gun, mi nuh know how im neva pizen ar im neva ketch jermz inna im mout, bout im dey play self dentiss, some peeple too brave man, all now mi cyaa beleeve im did duh dat.
    Mi nat even did memba bout dat dey marrij atall dem lucky. Tawkin bout dat yuh antie whey did married to young bwoy, sayka fi falla Neville antie, whey she nayme agen? mi ere peeple sey yuh antie did love young bwoy an did tink sey di bwoy she marrid was giftid inna im pants an chue she wussa play uprite inna church an she did well want fi give up har virginity she tek di bwoy an propose to im, buy ring an plan evryting.
    All she cyaa sey nutten to mi eh nuh Sweetssop, ah yuh antie, but mi go tell yuh b'foe yuh face, mi nuh like har one bit, she watch an chat peeple tummuch, a she did bring mi nayme uppa church sey mi did spread lice inna di community, poe mi. A one time mi ketch lice from di rasta bwoy uppa skool, an mi granny did use kerseen ile from outa lamp an tie up mi ed wid peeca white claawt an alla di lice dem did dead, a when mi guh a church di nex week, mi hear how evry baddy ketch lice. Yuh memba Miss Junie likkle suck finga pickney? wen we get break from outa sundey skool di sed day, a she tell mi sey dem dey sey a mi predd di lice, mi bex so till mi hawt full, mi cudden even eat di suck suck an jraps whey mi chuss fraw Miss Inez, trait dung a mi yawd mi guh an tell mi granny, but chue mi granny ah nuh di sumaddy fi trace, mi guh tell mi uncle who did live ova di Govament house which pawt di soljah dem used to camp out, im guh uppa church yuh si gyal, an rip up some dutty torey pan dem, mi shame so till. Pastah did haffi tap preach an guh out dey guh rebuke him, one peeca sinting...mi nuh noe eff yuh noe, but a dat did mek mi tap fraw guh a dat dey church, besides dat, mi neva too too like di peeple dem inna di church needa, dem chat dem one anedda tummuch. Fi yuh same antie one time did ask Panjella effa nuh dat dey frack Miss Junie wear come a church week b'foe laws, mi bex so till, but chue mi wassa pickney mi nuh guh inna di torey, mi mek mi haze deff. Yuh antie tap buy claawt an boot yet? evry Sundey she come a church inna new cloze an have big bill a evry shap an nuh whaa fi pay. Tawkin bout dat, she gat no pickney yet? caw mi did hear peeple wuzza talk sey she a mule, caw she cyaa ha no pickney, but mi nuh noe wha fi beleeve as mi did ere some adda peeple congrigate anda di starraple tree infront a di church pan har nayme how she dash whey belly, dem time mi neva noe wha dem mean, but as mi get olda mi andastan.
    Yuh mite a hide dah peeca torey yah, but mi hear Neville used to hide an guh een troo har back doe a nite time afta dem did mash up, dont tell mi yuh neva ere dat...a chue?

    Leave a comment:


  • Hush Darlin
    replied
    Re: We hear sey....Tories fram dung a Kuntry

    Originally posted by ChRiSsY72:
    [qb] Sweetssop wha mek yuh neva tell mi sey yuh an Neville was tird cousin? [/qb]
    Cousin whichi paawt.... a lie de ole kin teet tinkin mout bwoy a tell...de closes mi an him come fi bi famblit is one a mi cousin did marrid to oen a him aunty and dem divose bout 6 months afta dem marid
    Dem nay ha no pickney needa...mi sey di ooman couldnt cook fe save har life...if she bwile wate ie bunn...wen she try fi wash him clothes dem come out duttia dan before dem wash and as fe de ironin paawt mi sey de man chowziz ha bout fartylebenteen seams and as fe de bed paawt mi nat even a sey nottin caa mi hear sey im tell wan a im fren sey if you push a lag ie wi rroll but dat dey ooman neva kno how fe shake she dis li dung dead so
    Mi glad sey mi unkle did ha enuff sense fe come out a dat dey fambily....a Nevill hanty wey name Jessie .....the wan wey a sekritary dun a de PC bank

    Leave a comment:

Welcome to vBulletin!

Collapse

Welcome to your vBulletin forum! You can click "Edit Site" above for site administration options.

ads

Collapse

Latest Topics

Collapse

Trending

Collapse

There are no results that meet this criteria.

Working...
X