Patois bodderashun
Poems

Patois bodderashun

wah mek dem haffi chobble wi likkle twang?
mek dem nuh tek dem propa inglish an galang?
nuh everybady mek fi chat inglish lakka di queen
nuh everybady mek fi play golf pon put-put green

wah mek di whola wi haffi roun up wi mout
lakka seh wi deh nyaam whola trout?
lawd! mi cyaan tek dem deh sorta bodderashun!
jus undastan di patois an mek wi tan!
cho!

wen louise bennett write ar poem dem,
dem tun dem nose
all wen dem know seh dem deh laff bakka
door close!
wen olivah deh pap joke bout style an fashin
dem ak lakka seh dem nuh undastan a ting
but a dem same one deh siddung an laff
wen dem undah dem gin!

is ahright doh…mek dem tan
bikaah patois a fi wi, an’ it
naah leave dis ya lan’!

About the author

SimoneHudson