So Miriam yuh noh hear what gwaan dung a Berlin?
Mi dear di bway Bolt noh mash up worl recard and ting
Di Jamaicans gallop lef di hole a dem wey come fi challenge
Di lan weh gi birt to Quarrie, McKenley and Merlin’
When dem line dem up an sey dem fi get pan dem mark
When gun shot pap an wi sprinta tek aff, every man lef ina di dark
All yuh si a breeze an daylight backa Usain
When di res a dem finish di race, dem heng dem head ina shame
Some a dem a run out dem soulcase til dem mout lip a wabble
Mek every man a scratch dem head an di hole worl a scramble
Every man pan di di track a get deflate by a lightning jolt
Cause none a dem couden ketch wi Usain Bolt
Dem ago tyad fi si di Black Green an Gole Ganzi shut
Cause when wi dun reach a di finish line, dem still back a wi a strut
Between yuh an mi mi sarry fi dem who waan come tess
If dem know wah good fi dem, dem gi dis sprinting ting a ress
Gal yuh shoulda hear di sweet soun a wi national antem
Di flag raising high, waving side to side by di fans dem
Di hole stadium a Berlin gi dem undivided attentian
As wi akletes dem get dem well ova due recagnitian
Mi noh know bout yuh but ticket mi a buy fi London
Mi a bruck mi neck fi celebrate all wi worl champion
But if yuh noh si mi anyey ina di place
Mek sure yuh ready when dem announce sey Jamaica win di race!!
