Jamaica Win Di Race – Original Poem

So Miriam yuh noh hear what gwaan dung a Berlin?

Mi dear di bway Bolt noh mash up worl recard and ting

Di Jamaicans gallop lef di hole a dem wey come fi challenge

Di lan weh gi birt to Quarrie, McKenley and Merlin’


When dem line dem up an sey dem fi get pan dem mark

When gun shot pap an wi sprinta tek aff, every man lef ina di dark

All yuh si a breeze an daylight backa Usain

When di res a dem finish di race, dem head heng ina shame


Some a dem a run out dem soulcase til dem mout lip a wabble

Mek every man a scratch dem head an di hole worl a scrabble

Every man pan di di track a get deflate by a lightning jolt

Cause none a dem couden ketch wi Usain Bolt


Dem ago tyad fi si di Black Green an Gole Ganzi shut

Cause when wi dun reach a di finish line, dem still pan di track a strut

Between yuh an mi mi sarry fi dem who waan come test

If dem know wah good fi dem, dem gi dis sprinting ting a ress


Gal yuh shoulda hear di sweet soun a wi national antem

Di flag raising high, waving side to side by di fans dem

Di hole stadium a Berlin gi dem undivided attentian

As wi akletes dem get dem ova due recagnitian


Mi noh know bout yuh but ticket mi a buy fi London

Mi a bruck mi neck fi celebrate all wi worl champion

But if yuh noh si mi anywey ina di place

Mek sure yuh ready when dem announce sey Jamaica win di race!!

About the author

Joelle "Wendy" Wright

Joelle "Wendy" Cohen Wright is an author of character-driven Jamaican sketch comedy. She developed her love for sketch comedy after enrolling in a speech drama club in a Kingston primary school, where she won countless awards for her theatre performances.

Joelle is fast becoming one of the Caribbean's well-loved comedy writers. With her irrepressible sense of humor and a flair for dramatics, Joelle's writing style has the right comedic timing that is sure to induce laughter through her storytelling abilities in Jamaican patois. Ever the natural comedienne, she adds a fiery jolt of pure comic bliss to her series of characters and hilarious interpretations of Jamaican every day life.

Her first collection of sketches, "A Soh Wi Do It!" was published in 2010 and made rave reviews from readers across the world. The author dedicated the following years to penning the hilarious come backs entitled, "A Soh It Goh!" and "A Soh Dem Gwaan." Joelle holds a post graduate degree from the University of Maryland, University College, MD.